सिरुवा पाब्नित विविध कार्यक्रम
राजवंशीलार महानपर्व सिरुवा पर्व विविध कार्यक्रमेर आयोजना करिएने मनाइछे ।
३ दिनतक मनावार यिड पर्व राजवंशी,ताजपूरिया, गन्गाई,थारु, धिमाललगायतेर आदिवासीला मानाछे । तराईर् अधिकांश आदिवासीला मनावार यिड पाब्नि पहिला दिन पानी सिरुवा, दस्रा दिन काद सिरुवा आर तेस्रा दिन रंग सिरुवा मानाछे ।याहाँरे अवसरत राजवंशी समाज विकास समिति ज्यामिरगढी गाऊँ कमिटि र सम्मान तथा सांस्कृतिक कार्यक्रमेर आयोजना करिएने मानाले ।
पाब्नि अवसरत समिति र ४ जनाक गामछा आर प्रमाण पत्रसहित सम्मान कर्ले । सम्मानि हवार सहिद विरेन्द्र राजवंशीर बेटा नेत्र राजवंशी, सभासद् मानसिहं राजवंशी, तेक्वान्दो राष्ट्रिय खेलाडी सुलोचना राजवंशी आर जगवहादुर राजवंशी छिले । समाजटक महत्वपूर्ण योगदान दिवार कारण अमालाक सम्मान कर्ले । राजवंशी समाज विकास समिति र जिल्ला अध्ययक्ष टोम राजवंशीर प्रमुख अतिथ्यत हुवाल कार्यक्रमत विविध संस्कृति झल्कवार गीत, नृत्य आर नाटक प्रस्तुत करिस्ले । कमिटिर अध्ययक्ष वुधकरण राजवंशीर अध्ययक्षतात हुवाल कार्यक्रमत पवन राजवंशी, दलसिंहं राजवंशी जितेन राजवंशी, गोविन्द राजवंशी, डा गौतम राजवंशी, अर्जुन राजवंशी, आत्माराम राजवंशीलगायतेर उपस्थिति छिले ।
याहाँरे अवसरत पाब्निर तेस्रा दिन अनारमनी – ३ त सामुहिक रंग सिरुवा मनाइछे । रंग सिरुवात एक अर्काबीचत रंग लगाएने शुभकामना आदानप्रदान करेछे । रिस, राग त्यागिएने मनमुटावरक बिर्सिएने रंग खेलीएने हर्र्ष उल्लासेर साथ मनाले । सभाउ नयाँ बछरेर उपलक्ष्यत नयाँ कपडा लगावा, मिठ–मिठ परिकार बनाएने खावा आर गाजी मुरी खावार चलन छे । रंग सिरुवा दिन से हि विभिन्न ठाँएत मेला लागेछे ।
